<p><b>2026 யு19 உலகக்கோப்பை இறுதிப்போட்டியில், 14 வயதே ஆன ஒரு சிறுவன், உலகத்தரம் வாய்ந்த இங்கிலாந்து பந்துவீச்சை கையாண்ட விதம், ரசிகர்களை ஆச்சரியத்தில் உறைய வைத்துள்ளது.&nbsp;</b></p><p><br></p><p>இறுதிப்போட்டியின் அழுத்தம் என்பது அனுபவம் வாய்ந்த வீரர்களையே தடுமாறச் செய்யும். ஆனால், வைபவ் சூர்யவன்ஷிக்கு அந்த அழுத்தம் ஒரு உந்துசக்தியாக மாறியது. டாஸ் வென்று பேட்டிங்கைத் தேர்வு செய்த இந்திய அணிக்கு, தொடக்கத்திலேயே ஒரு விக்கெட் சரிந்தாலும், வைபவ் சூர்யவன்ஷி - ஆயுஷ் மாத்ரே ஜோடி இங்கிலாந்தின் பந்துவீச்சுத் திட்டங்களைச் சிதறடித்தது.</p><p><br></p><p>வெறும் 32 பந்துகளில் அரைசதம் கடந்த வைபவ், அதன் பிறகு விஸ்வரூபம் எடுத்தார். குறிப்பாக, இங்கிலாந்து சுழற்பந்து வீச்சாளர் ஃபர்ஹான் அஹ்மத் வீசிய 17-வது ஓவரில், அவர் விளாசிய 6, 6, 4, 6 என்ற ரன்கள், ஆட்டத்தின் போக்கையே மாற்றியது. 55 பந்துகளில் சதம் கடந்த அவர், அடுத்த 25 பந்துகளில் ரன் மெஷினாக மாறி 75 ரன்களைக் குவித்தார்.</p><p><br></p><p>சரிசமமான விகிதத்தில் மைதானத்தின் அனைத்துப் பக்கங்களிலும் பந்துகளைப் பறக்கவிட்டார். 218.75 என்ற மலைக்க வைக்கும் வேகத்தில் ரன் குவிப்பு. 71 பந்துகளில் 150 ரன்களைக் கடந்த போதே, யு19 கிரிக்கெட்டின் முதல் இரட்டைச் சதம் இறுதிப்போட்டியில் வரும் என எதிர்பார்க்கப்பட்டது. ஆனால், 175 ரன்களில் வைபவ் ஆட்டமிழந்து வெளியேறிய போது, அவரை வீழ்த்திய இங்கிலாந்து வீரர்கள் அனைவரும் ஓடி வந்து அவருக்குக் கைகொடுத்தனர். தோல்வியின் விளிம்பில் இருந்தாலும், ஒரு சிறந்த ஆட்டத்தை அங்கீகரிக்கும் அந்தப் பண்பு ரசிகர்களை நெகிழச் செய்தது.</p><p><br></p><p>யு19 உலகக்கோப்பை வரலாற்றிலேயே மிக முக்கியமான இன்னிங்ஸாக இது கருதப்படுகிறது. இந்த ஆட்டத்தின் மூலம், இந்திய சீனியர் அணிக்குத் தேவையான ஒரு அதிரடித் தொடக்க வீரர் கிடைத்துவிட்டார் என்றே தோன்றுகிறது. ஐபிஎல் ஏலத்தில் ஏற்கனவே கவனம் ஈர்த்த வைபவ், இன்று உலக அரங்கில் அசைக்க முடியாத ஒரு முத்திரையைப் பதித்துள்ளார்.&nbsp;</p>