திருநெல்வேலி மாவட்டத்தில் இருந்து 1986ம் ஆண்டு பிரிந்து வ.உ.சி பெயரால் தூத்துக்குடி மாவட்டம் தனி மாவட்டமாக உருவானது. மாவட்டத்தின் தலைநகரமான தூத்துக்குடியில் நாட்டிலுள்ள 12 பெரிய துறைமுகங்களில் ஒன்றான வஉசி துறைமுகம் இடம்பெற்றுள்ளது.

தென்னிந்தியாவிலேயே மிக வேகமாக வளரும் தொழிற்சாலை நகரமாக தூத்துக்குடி வளர்ந்து வருகிறது. தென்னகத்தின் நுழைவுவாயில் என்றும் அழைக்கப்படுகிறது.

துறைமுகம் தவிர அரசு மற்றும் தனியார் அனல்மின் நிலையங்கள், உரத்தொழிற்சாலைகள், கெமிக்கல் தொழிற்சாலைகள், கடல்சார் உணவு தயாரிப்பு நிறுவனங்கள், ஸ்பிக், டாக், மத்திய அரசின் கனநீர் ஆலை, உப்பு அளங்கள் மற்றும் பல்வேறு தனியார் தொழில் நிறுவனங்கள் அமைந்துள்ளது. மேலும் ரயில் நிலையம், விமான நிலையம் உள்ளிட்ட போக்குவரத்து வசதிகளும் உள்ளது.

இதனால், தூத்துக்குடி நகரம் நாளுக்குநாள் வளர்ச்சி அடைந்து வருகிறது. நகராட்சியாக இருந்த தூத்துக்குடி கடந்த 2008ஆம் ஆண்டு திமுக ஆட்சியில் மாநகராட்சியாக உருவானது. மாநகராட்சி பகுதியில் மட்டும் சுமார் 4.25 லட்சம் மக்கள் வசிக்கின்றனர். கல்வி அறிவில் மாநிலத்தில் முதன்மையான இடங்களில் ஒன்றாக தூத்துக்குடி இடம் பெற்றுள்ளது.

தூத்துக்குடியில் அரசு மற்றும் அரசு உதவிபெறும் பள்ளிகள், அரசு மருத்துவக்கல்லுரி, பொறியியல் கல்லூரி, பாலிடெக்னிக் கல்லூரி, ஐடிஐ போன்ற கல்வி நிறுவனங்கள் உள்ளது. ஆனால் இதுவரை அரசு கலை மற்றும் அறிவியல் கல்லூரி இல்லாதது தூத்துக்குடி மக்களுக்கு பெரும் குறையாகவே இருந்து வருகிறது. இங்கு பெண்களுக்கான தனியாக இயங்கக்கூடியது, ஆண் பெண் இருபாலரும் பயிலக்கூடிய தனியார் கலை அறிவியல் கல்லூரிகள் இருந்து வருகின்ற போதிலும், அரசு கலை மற்றும் அறிவியல் கல்லூரிக்கான கோரிக்கை பொதுமக்களிடையேயும், மாணவர்களிடையேயும் எழாமல் இல்லை.

கலைக்கல்லூரிகளில் மாணவ, மாணவியர் ஆர்வமுடன் சேர்ந்து விரும்புவதாலும், அதிக மக்கள் வசிக்க கூடிய பகுதி என்பதாலும், அதிகம் படித்தவர்கள் உள்ள நகரமாக இருப்பதாலும் கலை அறிவியல் கல்லூரிகளில் இடம் கிடைக்காமல் ஆண்டுதோறும் மாணவ, மாணவியர் தவித்து வருகின்றனர்.

மேலும் அரசு மற்றும் உதவிபெறும் பள்ளிகளில் 12ம் வகுப்பு தேர்ச்சி பெற்று வரும் சாதாரண குடும்பத்தை சேர்ந்த மாணவ மாணவியர் கல்வி கடௌடணங்களால் தனியார் கலை மற்றும் அறிவில் கல்லூரியில் சேர்ந்து படிக்க முடியாமல் படிப்பை நிறுத்தும் நிலை ஏற்படுகிறது. மாவட்டம் உருவாகி 38 ஆண்டுகள் ஆகியும் தலைநகரமான தூத்துக்குடியில் அரசு கலை அறிவியல் கல்லூரி அமைக்க வேண்டும் என்ற பொதுமக்களின் நீண்டநாள் எதிர்பார்ப்பு நிறைவடையாமல் இருந்து வருகிறது. 

இந்தநிலையில், தூத்துக்குடி மாநகரில் அரசு கல்லூரி துவங்கிட வேண்டும் என தமிழக நிதியமைச்சர் தங்கம் தென்னரசுவை நேரில் சந்தித்து இந்திய மாணவர் சங்க நிர்வாகிகள் கோரிக்கை விடுத்தனர். 

2025-2026 ம் ஆண்டுக்கான தமிழ்நாடு நிதிநிலை அறிக்கையில் கல்விக்கான கூடுதல் நிதியை ஒதுக்கீடு செய்து, கல்வியின் கட்டமைப்பு வசதிகளை மேம்படுத்திடவும், தூத்துக்குடி மாநகரில் அரசு கல்லூரி துவங்கிடவும் இந்திய மாணவர் சங்கத்தின் மாநிலச் செயலாளர் கோ. அரவிந்தசாமி தலைமையில் நிதித்துறை அமைச்சர் தங்கம் தென்னரசுவை நேரில் சந்தித்து கோரிக்கை மனு  கொடுக்கப்பட்டது. 

தூத்துக்குடி மாநகர மையப்பகுதியில் அரசு கலைக் கல்லூரி இல்லாத ஒரே காரணத்தினால் நகரத்தில் உள்ள அரசு உதவி பெறும் கல்லூரி மற்றும் தனியார் கல்லூரிகளில் பன்மடங்கு கட்டணங்களை உயர்த்தி வருகின்றனர். ஆகவே தூத்துக்குடி மாநகர் மையப் பகுதியில் கண்டிப்பாக அரசு கல்லூரி அமைத்திட வேண்டும் என்று வலியுறுத்தினர். இந்திய மாணவர் சங்கத்தின்  மத்திய குழு உறுப்பினர் சி.மிருதுளா, மாநில இணைச் செயலாளர் ரா.பாரதி உள்ளிட்டவர்கள் உடனிருந்தனர்