தூத்துக்குடி மாவட்டத்தில் ஸ்ரீவைகுண்டம் மிக முக்கிய பகுதியாகும். இங்கு நவதிருப்பதி தலங்களில் முதல் தலமாக விளங்கும் கள்ளபிரான் கோவில், நவகைலாயங்களில் 5 வது தலமாக விளங்கும் கைலாசநாதர் கோவில் என மிகவும் பிரசித்தி பெற்ற புண்ணிய தலங்கள் அதிக அளவில் உள்ளது.

தினந்தோறும் ஸ்ரீவைகுண்டம் பகுதிக்கு ஏராளமான பொதுமக்கள் வந்து செல்கின்றனர். நெல்லையில் இருந்து திருச்செந்தூர், உடன்குடி, சாத்தான்குளம், ஏரல் போன்ற பகுதிகளுக்கு செல்லும் பல்வேறு தனியார் பஸ்கள் ஸ்ரீவைகுண்டம் ஊருக்குள் வராமல் தாமிரபரணி ஆற்றின் கரையோரம் அமைந்துள்ள புதுக்குடி பஸ் நிலையத்தில் பயணிகளை இறக்கிவிட்டு செல்கின்றனர்.

இதனால், பேருந்தில் வரும் பயணிகள் ஒன்றரை கிலோமீட்டர் தூரம் நடந்து ஸ்ரீவைகுண்டத்திற்கு செல்ல வேண்டிய நிலை ஏற்பட்டு வருகிறது. இதுகுறித்து இந்த பகுதியை சேர்ந்த பொதுமக்கள் மற்றும் பயணிகள் பலமுறை காவல்துறையினர் மற்றும் தனியார் பஸ் டிரைவர் மற்றும் கண்டக்டரிடமும் கூறியுள்ளனர். ஆனால் தொடர்ந்து இதே நிலை நீடித்து வருகிறது.

இந்தநிலையில், உங்களை தேடி உங்கள் ஊரில் திட்டத்தின்படி ஸ்ரீவைகுண்டம் தாலுகாவில் தூத்துக்குடி ஆட்சியர் தங்கி குறைகளை கேட்டறிந்தார். அப்போது ஸ்ரீவைகுண்டம் பேருந்து நிலையத்துக்குள் பெரும்பாலான பேருந்துகள் வந்துசெல்வதில்லை என பொதுமக்கள் புகார் கூறினர். ஸ்ரீவைகுண்டம் பேருந்து நிலையத்துக்குள் வந்து செல்லாத 6 பேருந்துகளுக்கு ஆட்சியர் தலா ரூ. 10,000 அபராதம் விதித்தார். ஸ்ரீவைகுண்டம் பேருந்து நிலையத்துக்கு வராத பேருந்துகளின் பர்மிட் சஸ்பெண்ட் ஆகும் என ஆட்சியர் இளம்பகவத் எச்சரிக்கை விடுத்தார். இதனால், 30 ஆண்டுகால பிரச்சனைக்கு ஒரே நாளில் தீர்வு கண்ட தூத்துக்குடி ஆட்சியர் இளம்பகவத்துக்கு பொதுமக்கள் நன்றி தெரிவித்தனர்.