திருச்செந்தூர் சுப்பிரமணிய சுவாமி கோயிலில் தைப்பூச நாளான வருகிற 11ஆம் தேதி பூஜை நேரங்களில் மாற்றம் செய்யப்பட்டுள்ளது.

இதுகுறித்து இணை ஆணையர் சு. ஞானசேகரன் வெளியிட்ட செய்திக்குறிப்பு: 

திருச்செந்தூர் அருள்மிகு சுப்பிரமணிய சுவாமி கோயில் உற்சவரான சண்முகர், கடலில் கண்டெடுக்கப்பட்டு 370 ஆண்டுகள் ஆகின்றது. அதைக் கொண்டாடும் வகையில், சண்முகர் ஆண்டு விழா இம்மாதம் 10ஆம் தேதி நடைபெறுகிறது.

இதையொட்டி, அன்றைய தினம் கோயில் நடை அதிகாலை 4 மணிக்கு திறக்கப்படுகிறது. தொடர்ந்து, 4.30 மணிக்கு விஸ்வரூப தீபாராதனை, காலை 6 மணிக்கு உதயமார்த்தாண்ட அபிஷேகம்,10 மணிக்கு சண்முகர் அபிஷேகம், பிற்பகல் 3 மணிக்கு பிரதோஷ அபிஷேகம், 4 மணிக்கு சாயரட்சை தீபாராதனை, மாலை 5 மணிக்கு சுவாமி அலைவாயுகந்த பெருமான் வீதியுலா வந்து கோயில் சேர்தல், பின்னர் மற்ற கால பூஜைகள் நடைபெறும்.

மேலும், தைப்பூசத்தை முன்னிட்டு 11ஆம் தேதி (செவ்வாய்க்கிழமை) அதிகாலை 1 மணிக்கு நடை திறக்கப்பட்டு, 1.30 மணிக்கு விஸ்வரூப தீபாராதனை, 4 மணிக்கு உதயமார்த்தாண்ட அபிஷேகம், காலை 6 மணிக்கு தீர்த்தவாரி, 10 மணிக்கு சண்முகர் அபிஷேகம், பிற்பகல் 1 மணிக்கு சுவாமி அலைவாயுகந்த பெருமான் தைப்பூச மண்டபத்துக்கு புறப்படுதல், மாலை 5 மணிக்கு சுவாமி தங்க மயில் வாகனத்தில் வீதியுலா வருதல், தொடர்ந்து மற்ற கால பூஜைகள் நடைபெறும் என்று தெரிவித்துள்ளார்.