தூத்துக்குடியில் பிரபல உர நிறுவனமான ஸ்பிக் நிறுவனம் கையகப்படுத்திய 72 ஏக்கர் புறம்போக்கு நிலத்தை அரசு மீட்க வேண்டும் என உயர்நீதிமன்ற மதுரைக்கிளை உத்தரவிட்டுள்ளது.

தூத்துக்குடியில் ஸ்பிக் உர தயாரிப்பு நிறுவனத்துக்காக 1971 ஆம் ஆண்டில் முல்லைக்காடு, கோரம்பள்ளம் ஆகிய கிராம பகுதிகளில் 421 ஏக்கர் அரசு புறம்போக்கு நிலங்கள் ஒப்படைக்கப்பட்டது. மேலும் இதற்காக 810 ஏக்கர் தனியாரிடம் இருந்தும் வாங்கப்பட்டது. அங்கு உரம் தயாரிக்கும் தொழிற்சாலை தொடங்கப்பட்டு செயல்பட்டது.

அதனை தொடர்ந்து, மேலும் பல ஏக்கர் நிலங்களை ஸ்பிக் உர நிறுவனத்துக்காக கையகப்படுத்தும் நடவடிக்கைகளை அதிகாரிகள் மேற்கொண்டனர். இதற்கிடையே 1981ஆம் ஆண்டில் 30.40 ஏக்கர் நிலத்தை தனியார் கெமிக்கல் நிறுவனத்துக்கு ஸ்பிக் உர நிறுவனம் வழங்கியது.

பின்னர் ஸ்பிக் நிறுவனத்தால் கூடுதலாக கையகப்படுத்தப்பட்ட 663 ஏக்கர் நிலத்தை விவசாய பயன்பாட்டில் இருந்து விலக்கு அளித்து 2002 ஆம் ஆண்டில் அரசாணை பிறப்பிக்கப்பட்டது. இதில் அரசு புறம்போக்கு நிலங்கள் 72.59 ஏக்கரும் அடங்கும்.

இந்த நிலங்களை தொழிற்சாலைக்கு பயன்படுத்துவதில் விலக்கு அளிக்க மறுத்தும், அந்த நிலங்களை மீண்டும் அரசாங்கத்துக்கு மாற்றியும் திருநெல்வேலி நில நிர்வாக கமிஷனர் 2007 ஆம் ஆண்டில் உத்தரவிட்டார்.

இந்த உத்தரவுக்கு எதிராக ஸ்பிக் உர நிறுவனம் மற்றும் கெமிக்கல் நிறுவனம் தனித்தனியாக வேளாண் நில தீர்ப்பாயத்தில் மேல்முறையீடு செய்தது.

அங்கு இந்த மனுக்கள் 2014 ஆம் ஆண்டில் தள்ளுபடி செய்யப்பட்டது. இந்த உத்தரவினை மறு பரிசீலனை செய்யும்படி அந்த நிறுவனங்கள் சார்பில் மதுரை ஐகோர்ட்டில் மேல் முறையீடு மனு தாக்கல் செய்யப்பட்டனது. 

இந்த மனுக்களை நீதிபதி செந்தில்குமார் விசாரித்து பிறப்பித்த உத்தரவு வருமாறு:- "அரசு புறம்போக்கு என வகைப்படுத்தப்பட்ட அரசு நிலங்களில் தங்கள் தொழிற்சாலைகளை நிறுவுவதால் ஏற்படும் விளைவுகளை மனுதாரர்கள் தரப்பினர் நன்கு அறிந்திருக்கிறார்கள். இதற்கான விலக்குகளை அவர்கள் முறையாக பெறவிலலை. மேற்கண்ட நிலங்களை எந்த சட்ட அனுமதியும் இல்லாமல் மனுதாரர்கள் கட்டுப்பாட்டில் வைத்து உள்ளனர். அந்த நிலத்தை உடனடியாக அரசு மீட்டெடுக்க வேண்டும். இந்த மறு சீராய்வு மனுக்கள் தள்ளுபடி செய்யப்படுகின்றன என நீதிபதி உத்தரவிட்டார்.