தூத்துக்குடி அருகே தனியாக இருந்த பெண்ணிடம் கத்தியை காட்டி மிரட்டி 15 பவுன் தங்கநகைகளை கொள்ளையடித்து சென்ற மர்ம முகமூடி நபர்களை போலீசார் தேடி வருகின்றனர்.

தூத்துக்குடி அருகே உள்ள புதுக்கோட்டை மத்திய, மாநில அரசு ஊழியர் குடியிருப்பை சேர்ந்தவர் அருள்முருகன். இவர் தனியார் பள்ளிக்கூடத்தில் உடற்கல்வி ஆசிரியராக பணியாற்றி வருகிறார். இவருடைய மனைவி அன்னலட்சுமி (32). இவர் நேற்று மதியம் சுமார் 3 மணி அளவில் வீட்டில் தனியாக இருந்தாராம். அப்போது, அங்கு முகத்தில் பிரவுன் நிறத்தில் முகமூடி அணிந்த மர்ம நபர்கள் 3 பேர் வந்துள்ளனர். 

இதில், 2 பேர் வீட்டின் உள்ளே சென்றதாகவும், ஒருவர் வெளியில் நின்றதாகவும் கூறப்படுகிறது. இதனால் வீட்டுக்குள் சென்றவர்கள், திடீரென மறைத்து வைத்து இருந்த கத்தியை எடுத்து அன்னலட்சுமியை மிரட்டி நகைகளை பறித்துள்ளனர். அவர்கள் அன்னலட்சுமி அணிந்து இருந்த தங்கசங்கிலி, கம்மல் மற்றும் பீரோவில் இருந்த தங்க நகைகள் உள்பட மொத்தம் சுமார் 15 பவுன் தங்கநகையை கொள்ளையடித்து விட்டு தப்பி சென்று விட்டார்களாம்.

இதுகுறித்து தகவல் அறிந்த புதுக்கோட்டை போலீசார் சம்பவ இடத்துக்கு சென்று விசாரணை நடத்தினர். அந்த பகுதிகளில் உள்ள கண்காணிப்பு கேமிராக்களில் பதிவான காட்சிகளையும் கைப்பற்றி ஆய்வு செய்தனர். தொடர்ந்து போலீசார் தீவிர விசாரணை நடத்தி 3 பேரை பிடித்து விசாரணை நடத்தி வருகின்றனர்.