2024 ல் நடைபெற இருக்கும் நாடாளுமன்றத் தேர்தலுக்காக திமுக சார்பில் தேர்தல் அறிக்கை தயாரிக்கும் குழு அமைக்கப்பட்டு உள்ளது. இக்குழுவின் தலைவராக திமுக துணைப் பொதுச் செயலாளரும், தூத்துக்குடி நாடாளுமன்ற உறுப்பினருமான கனிமொழி கருணாநிதி நியமிக்கப்பட்டுள்ளார்.
இந்த தேர்தல் அறிக்கை தயாரிக்கும் குழுவினர் தமிழ்நாட்டின் ஒவ்வொரு பகுதிக்கும் நேரில் சென்று பல்வேறு தரப்பட்ட மக்களை சந்தித்து தேர்தல் அறிக்கையில் இடம்பெற வேண்டியவைகள் குறித்த கோரிக்கை மனுக்களை பெற உள்ளனர். அதன்படி தூத்துக்குடி நாடாளுமன்ற தொகுதிக்கு இன்று (05.02.2024 - திங்கள் கிழமை) காலை தூத்துக்குடி - திருச்செந்தூர் சாலை, உள்ள மாணிக்கம் மஹாலில் கோரிக்கை மனுக்களை பெற்றனர்.
அப்பொழுது, தூத்துக்குடி மாநகர் மாவட்ட காங்கிரஸ் தலைவர் சி.எஸ்.முரளிதரன் தலைமையில், தேர்தல் அறிக்கையில் இடம்பெற வேண்டிய தங்களது சார்பான கோரிக்கை மனுவினை அளித்தனர்.
அதில், தூத்துக்குடியில் போக்குவரத்து நெரிசல் ஏற்படுவதை தடுக்கும் வகையில் தூத்துக்குடி ரயில் நிலையத்திலிருந்து புறநகர் வரை மேம்பாலம் அமைத்து அதில் ரயில் தடங்கள் பதித்து, உயர் மட்ட ரயில் பாதை அமைத்து அதன் மூலம் ரயில்களை இயக்க நடவடிக்கை மேற்கொள்ள வேண்டும்.
மகாத்மா காந்தி வேலைவாய்ப்பு உறுதித் திட்டத்தில் கீழ் உள்ள நூறு நாள் வேலையாட்களை, கிராம புறங்களில் களை எடுத்தல், நாற்று நடுதல், அறுவடை பணி உள்ளிட்ட விவசாயத் தொழில்களில் ஈடுபடுத்திட வேண்டும்.
மீனவர்களுக்கு மீன்பிடி தடைகாலத்தில் வழங்கப்படும் நிவாரணத் தொகையை போல, பேரில் காலங்களில் மீன் பிடிக்க தடை விதிக்கப்படும் நாட்களையும் இணைத்து, அவர்களுக்கு உதவித்தொகையை இரட்டிப்பாக வழங்க நடவடிக்கை எடுக்க வேண்டும்.
ரயிலில் பயணிக்கின்ற மூத்த குடி மக்களுக்கு வழங்கிய பயண சலுகைகளை மோடி அரசு ரத்து செய்தது. மீண்டும் மூத்த குடி மக்களுக்கு இச்சலுகையை கிடைத்த உறுதி செய்ய வேண்டும் உள்ளிட்ட கோரிக்கைகளை இடம்பெற்றிருந்தன.
