தூத்துக்குடி தருவை மைதானத்தில் இருசக்கர வாகனம் நிறுத்தும் இடத்தில் நிறுத்தியிருந்த இருசக்கர வாகனத்தை திருடியவரை போலீசால் கைது செய்தனர்.

தூத்துக்குடி சுந்தரவேல்புரம் பகுதியை சேர்ந்த நாகேந்திரன் மகன் சரவணன் (27) என்பவர் தனது இருசக்கர வாகனத்தை கடந்த 12.07.2022 அன்று தூத்துக்குடி தருவை மைதானத்தில் இருசக்கர வாகனம் நிறுத்தும் இடத்தில் நிறுத்திவிட்டு சிறிது நேரம் கழித்து வந்து பார்க்கும்போது நிறுத்தி வைத்திருந்த அவரது இரு சக்கர வாகனம் திருடு போனது தெரியவந்துள்ளது.

இதுகுறித்து சரவணன் நேற்று (14.07.2022) அளித்த புகாரின் பேரில் தென்பாகம் காவல் நிலைய போலீசார் விசாரணை மேற்கொண்டதில் தூத்துக்குடி மீளவிட்டான் சின்னகண்ணுபுரம் பகுதியை சேர்ந்த கருப்பசாமி மகன் மோகன் (32) என்பவர் மேற்படி சரவணனின் இருசக்கர வாகனத்தை திருடியது தெரியவந்தது.

இதனையடுத்து தென்பாகம் காவல் நிலைய உதவி ஆய்வாளர் பாஸ்கரன் வழக்கு பதிவு செய்து  மோகனை கைது செய்து, அவரிடமிருந்து திருடப்பட்ட ரூபாய் 50,000 மதிப்பிலான இருசக்கர வாகனத்தையும் பறிமுதல் செய்தார்.