தமிழக வெற்றிக் கழகம் நிர்வாகி சஜி மறைவுக்கு தமிழக வெற்றிக் கழகம் கட்சியின் தலைவர் விஜய், அவரது மரணம் மிகுந்த அதிர்ச்சியையும் மன வேதனையையும் அளிப்பதாகவும் உருக்கமாக இரங்கல் தெரிவித்துள்ளார்.

தமிழக வெற்றிக் கழகம் கட்சி வரும் 2026 சட்டமன்றத் தேர்தலை இலக்காக வைத்து செயல்பட்டு வருகிறது. அதற்காக கட்சியின் உள்கட்டமைப்புகளை வலுப்படும் பணிகளில் விஜய் தீவிரமாக செயல்பட்டு வருகிறார். இதற்காக 234 தொகுதிகளையும் 125 மாவட்டங்களாக பிரித்து மாவட்ட செயலாளர்கள் நியமிக்கப்பட்டு வருகின்றனர். இதுவரை மொத்தம் 6 கட்டமாக நிர்வாகிகள் நியமிக்கப்பட்டுள்னர். இந்த நிர்வாகிகள் நியமனத்திற்கு ஒப்புதல் பெற தமிழக வெற்றிக் கழகம் கட்சியின் பொதுக்குழு கூட்டமும் நடைபெற உள்ளது. இந்நிலையில், கட்சி நிர்வாகியின் ஒருவரின் மரணம், அக்கட்சியின் தலைவர் விஜய்யை கலங்க செய்துள்ளது.

தமிழக வெற்றிக் கழகத்தின் திருநெல்வேலி வடக்கு மாவட்ட செயலாளர் சஜி என்கிற அந்தோணி சேவியர் திடீர் மாரடைப்பால் காலமானார். அவரது மறைவுக்கு தமிழக வெற்றிக் கழகம் கட்சியின் தொண்டர்கள் மற்றும் நிர்வாகிகள் பலர் சமூக வலைதளங்களில் இரங்கல் தெரிவித்து வருகின்றனர். தவெக தலைவர் விஜய்யும் நெல்லை வடக்கு மாவட்ட செயலாளர் சஜியின் மறைவுக்கு இரங்கல் தெரிவித்துள்ளார்.

இதுதொடர்பாக அவர் பதிவிட்டுள்ள ட்வீட்டில்:- 

தமிழக வெற்றிக் கழகத்தின் திருநெல்வேலி வடக்கு மாவட்டச் செயலாளராகப் பொறுப்பு வகித்து வந்த அன்பிற்குரிய சகோதரர் சஜி (எ) B.அந்தோணி சேவியர் அவர்கள் காலமானது, மிகுந்த அதிர்ச்சியையும் மன வேதனையையும் அளிக்கிறது என குறிப்பிட்டுள்ளார்.

மேலும் தன் மீதும் கழகத்தின் மீதும் அளவற்ற அன்பு கொண்டு கழகப் பணியாற்றி வந்தவர் என்றும் அவரைப் பிரிந்து வாடும் அவரது குடும்பத்தினர், உறவினர்கள் மற்றும் நண்பர்களுக்கு தனது ஆழ்ந்த அனுதாபத்தைத் தெரிவித்துக்கொள்வதாகவும் தெரிவித்துள்ளார். அவரது ஆன்மா சாந்தியடைய இறைவனைப் பிரார்த்திப்பதாகவும் தவெக தலைவர் விஜய் தனது பதிவில் குறிப்பிட்டுள்ளார்.

நேற்று முன்தினம் சென்னை பனையூரில் உள்ள தமிழக வெற்றிக் கழகம் கட்சி அலுவலகத்தில் சஜி, தவெக தலைவர் விஜய்யை சந்தித்து பேசினார். அலுவலத்தின் வாயிலில் காதித்திருந்த சஜியை, அழைத்து அணைத்து பேசி நலம் விசாரித்தார் விஜய். இது தொடர்பான வீடியோக்கள் சமூக வலைதளங்களில் வைரலானது. இந்நிலையில் அந்த வீடியோவை ஷேர் செய்து தவெக தொண்டர்கள் தங்களின் துயரத்தை பகிர்ந்து வருகின்றனர்.

சஜியின் உடலுக்கு தவெக பொதுச் செயலாளர் ஆனந்த் நேரில் சென்று அஞ்சலி செலுத்தினார். அப்போது சஜியின் உடலை பார்த்து அவர் கதறி அழுதது காண்போரை கலங்கச் செய்துள்ளது.