ஓமந்தூர் பி.ராமசாமி ரெட்டியாரின் 130 வது பிறந்தநாளை முன்னிட்டு, அவரது திருஉருவச்சிலைக்கு மாலை அணிவித்து மரியாதை செய்ய தமிழ்நாடு ரெட்டி நல சங்கத்தின் மாவட்ட, ஒன்றிய, நகர, கிராம நிர்வாகிகள், தொண்டர்கள் அனைவரும் தங்களது குடும்பத்தோடு வருகை தருமாறு இரா.ஜெயராமன் ரெட்டியார் அழைப்பு விடுத்துள்ளார்.

விழுப்புரம் மாவட்டம், திண்டிவனம் வட்டம், ஓமந்தூர் கிராமத்தில் 1895ம் ஆண்டு பிறந்த ஓமந்தூர் பி.ராமசாமி ரெட்டியார் இளம் வயதிலேயே சட்டம் பயின்று சுதந்திரப் போராட்டத்தில் ஈடுபட்டவர். சுதந்திர இந்தியாவின் முதல் சென்னை மாகாண முதலமைச்சராக 1947 முதல் 1949 வரை பதவி வகித்தவர்.

விவசாயிகள் மற்றும் ஏழை, எளியோர்களின் முன்னேற்றத்திற்காக உழைப்பு, நேர்மை, கண்ணியம், கட்டுப்பாடு, சன்மார்க்கம், நீதி தவறாமை ஆகிய குறிக்கோள்களுடன் ஆட்சியை நடத்தியவர். அனைவரும் சட்டத்திற்கு முன் சமம் என பல நலத்திட்டங்களைக் கொண்டு வந்தவர்.

எதையும் வெளிப்படையாகப் பேசும் துணிச்சல் மிக்கவர், சிறந்த எழுத்தாளர், சமூக சேவகர், நேர்மையும் துணிச்சலும் மிக்க கறைபடாத அரசியல்வாதியாகப் போற்றப்பட்ட இவர் 1970 ஆம் ஆண்டில் தனது 75 வது வயதில் காலமானார். தமிழ்நாடு அரசு இவரது நினைவாக சொந்த ஊரான ஓமந்தூரில் மணிமண்டபம் அமைத்துள்ளது. தமிழ்நாடு அரசு இவரின் நினைவாக தபால் தலையும் வெளியிட்டது என்பது குறிப்பிடத்தக்கது.

இந்த நிலையில், ஓமந்தூர் பி.ராமசாமி ரெட்டியாரின் பிறந்த நாள் மற்றும் நினைவு நாளை முன்னிட்டு பல்வேறு அரசியல் கட்சியினர், அமைப்பினர் அவரது நினைவாக சொந்த ஊரான ஓமந்தூரில் உள்ள மணிமண்டபத்திற்கு சென்று ஓமந்தூர் பி.ராமசாமி ரெட்டியாரின் திருஉருவச்சிலைக்கு மாலை அணிவித்து மரியாதை செய்து வருகின்றனர். 

அந்த வகையில், வருகிற பிப்ரவரி 1ஆம் தேதி ஓமந்தூர் பி.ராமசாமி ரெட்டியாரின் 130 வது பிறந்த நாளை முன்னிட்டு காலை 11 மணிக்கு திண்டிவனம் பைபாஸ் ரோடு ஆரியாஸ் ஹோட்டல் அருகில் இருந்து ஊர்வலமாக புறப்பட்டு ஓமந்தூரில் உள்ள மணிமண்டபத்திற்கு சென்று ஓமந்தூர் பி.ராமசாமி ரெட்டியாரின் திருஉருவச்சிலைக்கு மாலை அணிவித்து மரியாதை செய்ய இருப்பதால், தமிழ்நாடு ரெட்டி நல சங்கத்தின் மாவட்ட, ஒன்றிய, நகர, கிராம நிர்வாகிகள், தொண்டர்கள் அனைவரும் தங்களது குடும்பத்தோடு வந்து கலந்து கொள்ளுமாறு இரா.ஜெயராமன் ரெட்டியார் அழைப்பு விடுத்துள்ளார்.