கவரைப்பேட்டை ரயில் விபத்திற்கான காரணம் குறித்து தெற்கு ரயில்வே அறிக்கை வெளியிட்டுள்ளது. அதில் பாக்மதி ரயில் மெயின் லைனில் செல்லாமல் லூப் லைனில் சென்றதே விபத்துக்கு காரணம் என தெற்கு ரயில்வே தெரிவித்துள்ளது.

கர்நாடக மாநிலம் மைசூரில் இருந்து பிஹார் மாநிலம் தர்பங்காவுக்கு சுமார் 2,000 பயணிகளுடன் நேற்று காலை 10.30 மணிக்கு பாக்மதி எக்ஸ்பிரஸ் ரயில் புறப்பட்டது. இந்த ரயிலானது ஜோலார்பேட்டை, அரக்கோணம், வழியாக கும்மிடிப்பூண்டி மார்க்கத்தில் 90 கி.மீ. வேகத்தில் நேற்று இரவு 8.27 மணி அளவில், திருவள்ளூர் மாவட்டம் கவரைப்பேட்டை ரயில் நிலையம் அருகே சென்றபோது, அங்கு ஏற்கெனவே நின்று கொண்டிருந்த சரக்கு ரயில் மீது திடீரென மோதி விபத்துக்குள்ளானது. 

இந்த விபத்தில் அந்த ரயிலின் 12 பெட்டிகள் தடம்புரண்டது. மேலும், ரயிலின் பார்சல் பெட்டியில் அடிப்பகுதியில் தீப்பிடித்தது. இதையடுத்து விபத்து குறித்து தகவல் அறிந்த ரயில்வே அதிகாரிகள், திருவள்ளூர் மாவட்ட அரசு அதிகாரிகள், ரயில்வே போலீஸார், ஆர்.பி,எஃப். போலீஸார் மற்றும் பேரிடர் மீட்பு குழுவினர் சம்பவ இடத்திற்கு விரைந்து சென்று மீட்புப்பணியில் ஈடுபட்டனர்.

நல்ல வாய்ப்பாக இந்த விபத்தில் உயிரிழப்பு ஏதும் ஏற்படவில்லை. இருப்பினும் 19 பேர் காயமடைந்தனர். அவர்கள் பொன்னேரி, கும்மிடிப்பூண்டி மற்றும் ஸ்டான்லி மருத்துவமனைக்கு அனுப்பி வைக்கப்பட்டனர். ரயில்கள் தொடர்ந்து விபத்துக்குள்ளாகி வருவது மக்களிடையேபெரும் அச்சத்தை ஏற்படுத்தியுள்ளது. இந்நிலையில், ரயில் விபத்திற்கான காரணம் குறித்து தெற்கு ரயில்வே அறிக்கை வெளியிட்டுள்ளது.

அதில், பாக்மதி ரயில் லூப் லைனில் சென்றதே விபத்துக்கு காரணம் என தெற்கு ரயில்வே தெரிவித்துள்ளது. லைன் சிக்னல் கொடுக்கப்பட்டதும் ரயில் மெயின் லைனுக்கு செல்லாமல் லூப் லைனில் சென்றதாக தகவல் வெளியாகியுள்ளது. சரக்கு ரயில் நின்று கொண்டிருந்த லுப் லைனில் 90 கிலோ மீட்டர் வேகத்தில் பாக்மதி ரயில் சென்றுள்ளது.

90 கிலோ மீட்டர் வேகத்தில் சென்ற நிலையில் லோகோ பைலட் சுப்ரமணியன் ரயிலை நிறுத்த முற்பட்டாரா எனவும் விசாரணை நடத்தப்பட்டு வருகிறது. கவரப்பேட்டை ரயில் நிலையத்தில் உள்ள நான்கு தண்டவாளங்களில் இரண்டு பிரதானமாக பயன்படுத்தப்படுகிறது. மூன்று நாட்களாக லுப் லைனில் நின்று கொண்டிருந்த சரக்கு ரயில் குறித்த ஸ்டேஷன் மாஸ்டருக்கு தெரியாதா என்றும் கேள்வி எழுந்துள்ளது. இதுகுறித்து தொடர்ந்து விசாரணை நடத்தப்படும் எனவும் தெற்கு ரயில்வே தெரிவித்துள்ளது.