ஸ்பெயினில் இருந்து  தாயகம் திரும்பிய முதல்வர், நான் தமிழ்நாட்டுக்கு பல்வேறு முதலீடுகளை ஈர்த்துவிட்டு வந்துள்ளேன். கடந்த ஜனவரி 29ஆம் தேதி ஸ்பெயின் சென்றேன். முதலாவதாக ஸ்பெயினின் முன்னணி தொழில் அதிபர்கள் பங்கேற்கும் முதலீட்டாளர்கள் மாநாடு நடைபெற்றது. ஸ்பெயின் பொருளாதாரம் மற்றும் வர்த்தக கூட்டமைப்பின் நிர்வாகிகளை சந்தித்தேன்.

தமிழ்நாட்டில் தொழில் தொடங்குவதற்குரிய உகந்த சூழல் குறித்து மாநிலத்தில் முதலீடுகளை மேற்கொள்ள வலியுறுத்தினேன். காற்றாலை மின் உற்பத்தி, நீர் மறுசுழற்சியில் முன்னணியில் உள்ள ஆக்சியானா நிறுவனம், உயர்தர வீட்டுக்கட்டுமான பொருட்களை உற்பத்தி செய்யும் ரோக்கா, கண்டெயினர் முனையங்களை அமைக்கும் ஹபக்ராயுடு நிறுவனம், சாலை கட்டமைப்பு வசதிகளை செய்யும் அப்ரட்டீஸ் நிறுவனம், மோட்டார் வாகன உற்பத்தி செய்யும் கெஸ்டாம் நிறுவனம், ரயில்வே சார் பொருட்களை உற்பத்தி செய்யும் டால்கோ நிறுவனம், பொறியியல் வடிவமைப்பு பயிற்சிக்கான எடிபான் நிறுவனம், மருந்து உற்பத்தி நிறுவனமான மேப்ட்ரீ நிறுவனங்களின் நிர்வாகிகளை சந்தித்து பேசினேன்.

இவர்கள் தங்கள் முதலீடுகள் செய்ய ஆர்வம் தெரிவித்துள்ளனர். இதனால் 3 ஆயிரத்து 440 கோடி அளவுக்கு ஒப்பந்தங்கள் செய்யப்பட்டன என பத்திரிக்கையாளர்கள் சந்திப்பில் தெரிவித்தார். 

மேலும், வேறு நாடுகளுக்கு செல்ல திட்டம் உள்ளதா என்ற பத்திரிக்கையாளர்களின் கேள்விக்கு, திட்டமிடும்போது உங்களிடம் சொல்லிட்டு செய்கிறேன், நாடாளுமன்றத் தேர்தலுக்கு பிறகு என்னுடைய பயணம் இருக்கும் என்று கூறினார்.

நாடாளுமன்றத்தில் பிரதமர் உரையை பார்த்தீர்களா என்ற செய்தியாளர்களின் கேள்விக்கு, "பார்த்தேன், படித்தேன், ரசித்தேன், சிரித்தேன். பாஜகதான் எதிர்க்கட்சி போலவும், காங்கிரஸ்தான் ஆளும் கட்சி போலவும் அவர் பேசி உள்ளார் என்றார்". 

400 இடங்களை கைப்பற்றுவோம் என பிரதமர் கூறியதற்கு உங்களின் கருத்து என்ன என்று கேட்டதற்கு, மொத்தம் 400 தானா, 543 இடங்களையும் கைப்பற்றுவோம் என்று சொன்னாலும் ஆச்சரியப்படுவதற்கு இல்லை என்று கூறினார்.

விஜய் அரசியல் கட்சி தொடங்கி உள்ளது குறித்து உங்கள் பார்வை என்ற பத்திரிக்கையாளரின் கேள்விக்கு, "மக்களுக்கு தொண்டாற்ற யார் வந்தாலும் நான் மகிழ்வேன் என்று தனது கருத்தை தெரிவித்தார்".