அமைச்சராக பதவி ஏற்ற பின்னர் உதயநிதி ஸ்டாலின் முதல் முறையாக தனியார் தொலைக்காட்சி ஒன்றுக்கு அண்மையில் பிரத்யேகமாக பேட்டியளித்திருந்தார். அதுதொடர்பாக செய்தியாளர் சந்திப்பில் பதிலளித்த பாஜக மாநிலத் தலைவர் அண்ணாமலை, “உதயநிதி ஸ்டாலினின் பேட்டியைப் பார்த்தேன்... பார்த்து பக்குவமாக பல்லு படப் போகிறது என்று சொல்வார்கள். அதுபோலவே நட்பு ரீதியிலான கேள்விகளை நெறியாளர் எழுப்பி இருந்தார்” என்று தெரிவித்தார்.
அண்ணாமலை பேசியது இரட்டை அர்த்தத்தில் இருந்ததாக கடும் குற்றச்சாட்டு எழுந்தது. இதுதொடர்பாக ஊடகவியலாளர் சங்கங்களும் அண்ணாமலைக்கு எதிர்ப்பை பதிவு செய்திருந்தன. அண்ணாமலை பகிரங்க மன்னிப்பு கேட்கும் வரை அவரது ஊடக சந்திப்புகளை புறக்கணிக்க வேண்டும் என்று மாற்றத்திற்கான ஊடகவியலாளர்கள் சங்கம் வலியுறுத்தி உள்ளது.
ஆனால், எந்த காலத்திலும் மன்னிப்பு கேட்க முடியாது எனவும், தனது ஊர் வட்டார மொழியிலேயே அப்படி பேசியதாகவும் அண்ணாமலை விளக்கம் அளித்தார். எனினும் அண்ணாமலையின் கருத்துக்கு கண்டனங்கள் வலுத்து வருகின்றன.
இதுதொடர்பாக திமுக துணை பொதுச் செயலாளர் கனிமொழி தனது ‘எக்ஸ்’ பக்கத்தில், “அண்மையில் பாஜக தலைவர் அண்ணாமலை ஒரு மாநிலத்தின் அமைச்சர் குறித்தும், பத்திரிக்கையாளர் ஒருவர் குறித்தும் தரம் தாழ்ந்த வகையில் பேசியிருப்பது கடும் கண்டனத்திற்குரியது. தொடர்ந்து இவ்வாறு ஒருவர் பேசிவருவது அரசியல் தரத்தையே தாழ்த்துகிறது. இதை வன்மையாகக் கண்டிக்கிறேன்” என்று குறிப்பிட்டு இருந்தார்.
இதற்கு பதிலளித்துள்ள அண்ணாமலை, ஆண்டாண்டு காலமாக தரம் தாழ்ந்த மொழியில் மட்டுமே பேசிப் பழகிய திமுகவினருக்கு, எங்கள் பகுதியின் வழக்கு மொழி தவறாகத் தெரிவதில் வியப்பில்லை என்று குறிப்பிட்டார்.
தொடர்ந்து, “உங்கள் தந்தை, மறைந்த திமுக தலைவர் கருணாநிதி முதற்கொண்டு திமுக தெருமுனைப் பேச்சாளர்கள் வரை பேசும் தரக்குறைவான பேச்சை விட எந்தக் காலத்திலும், யாரும், யாரையும் தரக்குறைவாகப் பேசிவிட முடியாது” என்றும் கூறிய அண்னாமலை, அப்படி ஒரு கட்சியில் இருந்து கொண்டு, தரக்குறைவான பேச்சு பற்றி அறிவுரை கூறும் தகுதி உங்களுக்கு இல்லை எனவும் விமர்சித்துள்ளார்.
மேலும், எந்த விதத் தகுதியும் அற்றவர்களுக்கு, வெற்று விளம்பரம் மூலம் ஒரு பிம்பம் கட்டமைக்க முயல்பவர்களை, பொதுச் சமூகம் இப்படித்தான் எதிர்கொள்ளும் என்பதை நீங்கள் புரிந்து கொள்வது நலம் என்றும் அண்ணாமலை கூறியுள்ளார். இதனால் இந்த விவகாரம் முடிவில்லாமல் தொடர்ந்துகொண்டே இருக்கிறது.
