வாரணாசி மக்களவைத் தொகுதியில் பிரதமர் நரே்திர மோடிக்கு டஃப் கொடுத்து வருகிறார் காங்கிரஸ் வேட்பாளர் அஜய் ராய். அவர் மூன்றாவது முறையாக மோடியை எதிர்த்து போட்டியிட்டிருக்கிறார் என்பது குறிப்பிடத்தக்கது.

உத்தர பிரதேச மாநிலத்தில் இருக்கும் வாரணாசி மக்களவைத் தொகுதியில் பிரதமர் நரேந்திர மோடி போட்டியிட்டிருப்பதால் நாட்டு மக்களின் அனைவரது கவனமும் அங்கு தான் இருக்கிறது. வாக்கு எண்ணிக்கை தொடங்கியதில் இருந்து மோடி தான் முன்னிலை வகிப்பார் என பாஜகவினர் நம்பிக்கையுடன் கூறினார்கள். ஆனால் யாரும் எதிர்பாராத வகையில் முதல் நான்கு சுற்றுகளில் காங்கிரஸ் வேட்பாளரான அஜய் ராய் தான் முன்னிலையில் இருந்தார்.

5வது சுற்றில் இருந்து அஜய் ராய் பின்தங்கினாலும் சொற்ப வாக்குகள் வித்தியாசத்தில் தான் இருக்கிறார். இதை பார்த்த மக்களோ, அடங்கேப்பா மோடிக்கே டஃப் கொடுக்கிறாரே யாருப்பா இந்த அஜய் ராய் என கூகுளிடம் கேட்டுக் கொண்டிருக்கிறார்கள்.

பாஜகவில் இருந்தவர் தான் அஜய் ராய். உத்தர பிரதேசத்தில் இருக்கும் kolsala சட்டசபை தொகுதியில் பாஜக சார்பில் போட்டியிட்டு 1996, 2002 மற்றும் 2007 ஆகிய ஆண்டுகளில் வெற்றி பெற்றார். அதன் பிறகு அவருக்கு தேர்தலில் போட்டியிட சீட் மறுக்கப்பட்டது.

இதையடுத்து, சமாஜ்வாதி கட்சியில் சேர்ந்த அஜய் ராய் 2009ம் ஆண்டு நடந்த மக்களவைத் தேர்தலில் வாரணாசி தொகுதியில் போட்டியிட்டு தோல்வி அடைந்தார். பின்னர், அந்த கட்சியில் இருந்து விலகிய அவர் காங்கிரஸ் கட்சியில் சேர்ந்தார்.

2014ஆம் ஆண்டு நடந்த மக்களவைத் தேர்தலில் பிரதமர் மோடியை எதிர்த்து வாரணாசி தொகுதியில் காங்கிரஸ் சார்பில் போட்யிட்டு தோல்வி அடைந்தார். இதையடுத்து, 2019ம் ஆண்டு மக்களவைத் தேர்தலிலும் வாரணாசி தொகுதியில் மீண்டும் மோடியை எதிர்த்து போட்டியிட்டு தோல்வி அடைந்தார்.

இந்நிலையில் தான் மூன்றாவது முறையாக தற்போது வாரணாசி தொகுதியில் மோடியை எதிர்த்து களமிறங்கியிருக்கிறார். கடந்த இரண்டு முறை போன்று இல்லாமல் இந்த முறை மோடிக்கு டஃப் கொடுத்துக் கொண்டிருக்கிறார் அஜய் ராய்.

இந்த முறை 5 லட்சம் வாக்குகள் வித்தியாசத்தில் வாரணாசியில் மோடி வெற்றி பெறுவார் என்றார்கள் பாஜகவினர். ஆனால், மோடிக்கும் அஜய் ராய்க்கும் இடையே லட்சம் வாக்குகள் கூட வித்தியாசம் இல்லை. அதனால் வாரணாசி தொகுயில் என்ன வேண்டுமானாலும் நடக்கலாம் என்கிற நிலைமை தான் இருக்கிறது.

அஜய் ராய் தற்போது உத்தர பிரதேச மாநிலத்தின் காங்கிரஸ் தலைவர் என்பது குறிப்பிடத்தக்கது.