<p><b>இந்த வருடம் தீபாவளி பண்டிகையில் கார்த்தியின் ஜப்பான், லாரன்சின் ஜிகர்தண்டா 2 , விக்ரம் பிரபுவின் ரெய்டு ஆகிய 3 படங்கள் தீபாவளிக்கு மோத தயாராகி உள்ளது.</b><br></p><p>இந்த வருடம் தீபாவளி பண்டிகையில் கார்த்தியின் ஜப்பான், லாரன்சின் ஜிகர்தண்டா 2 ஆகிய படங்கள் வெளியாகும் என்று அறிவித்து இருந்தனர். தற்போது விக்ரம் பிரபுவின் ரெய்டு படமும் போட்டியில் இணைகிறது. இதன் மூலம் தீபாவளிக்கு 3 படங்கள் மோத தயாராகி உள்ளது.</p><p>ஜப்பான் படத்தை ராஜுமுருகன் இயக்கி உள்ளார். இவர் தேசிய விருது பெற்ற ஜோக்கர் படத்தை இயக்கி பிரபலமானவர். இது கார்த்திக்கு 25-வது படம் ஆகும். நாயகியாக அனு இம்மானுவேல் நடித்துள்ளார்.</p><p>சித்தார்த் நடித்த ஜிகர்தண்டா படத்தின் இரண்டாம் பாகமாக ஜிகர்தண்டா 2 உருவாகி உள்ளது. இதில் லாரன்சுக்கு வில்லனாக எஸ்.ஜே.சூர்யா நடித்துள்ளார் கார்த்திக் சுப்புராஜ் இயக்கி உள்ளார். இந்தப்படம் அதிரடி சண்டை படமாக உருவாகி உள்ளது.</p><p>விக்ரம் பிரபுவின் 'ரெய்டு' படம் கன்னடத்தில் சிவராஜ்குமார் நடிப்பில் உருவான 'தகறு' என்ற படத்தின் தமிழ் ரீமேக்காக தயாராகி உள்ளது. இந்தப்படத்தில் ஸ்ரீதிவ்யா, அனந்திகா, ரிஷி ரித்விக், சவுந்தர்ராஜா உள்ளிட்ட பலர் நடித்துள்ளனர். கார்த்தி இயக்கி உள்ளார்.</p><p>ஏற்கனவே தீபாவளிக்கு வெளியாக இருந்த சிவகார்த்திகேயனின் அயலான் படத்தை பொங்கல் பண்டிகைக்கு தள்ளி வைத்து விட்டனர். இதுபோல் தீபாவளிக்கு வரும் என்று எதிர்பார்த்த விக்ரமின் துருவ நட்சத்திரம் படம் நவம்பர் இறுதிக்கு போகிறது.</p>